▲越秀公园中山纪念碑下，有一个清朝所建嘅石牌坊，背面刻住“古之楚亭”四字。
“羊城”可以话系广州最具代表性嘅别名，「羊城」、「五羊城」、「穗城」均来源于五羊传说，传说故事已经广为大众所知，就唔再累述。
虽然如今嘅番禺只系广州一个行政区，但系相当长一段时间，“番禺”曾经系广州嘅市名。
“番禺”二字，战国时期已经存在，佢嘅缘由众说纷纭，其中为大部分人接受认同嘅系，番禺源自于番山、禺山两座山。
此时嘅南海郡相当于今广东省大部分地区，并非今日佛山嘅南海区，南海郡郡治于番禺县（即广州）。
秦始皇派出嘅平定岭南嘅军队，以任嚣为主帅，赵佗为副帅，任嚣征战有功，被委任为南海郡尉，扎根岭南，兴土修筑番禺城，被称为“任嚣城”。
“任嚣城”系广州历史上第一座城池，奠定咗广州建城起点，故史学家将“任嚣城”建立嘅公元前214年，定为广州建城之始。
任嚣病重，赵佗继任南海郡尉，继续筑城扩墙，“任嚣城”易主，名称自然就变为“赵佗城”。
而步骘城，就系源自于东吴嘅一位臣子——步骘（诸葛亮舌战群儒仲第三位提出刁难问题者）。
汉武帝灭南越之后，广州就如同被打入冷宫，一Down就Down几百年，直到有位贵人出现，阿个人就系步骘。
步骘被孙权委派任职交州刺史（交州为今日两广大部分地区），任职期间发现番禺县地大物博，人杰地灵，但系被人闲置。
步骘马上上书孙权，重修番禺城，振兴呢个南越古城，广州得以重生，民间为感谢步骘，会将广州称为“步骘城”。
上边讲到，赵佗出任南海郡嘅“地方行政长官”，但系赵佗唔甘心剩系做个地方小官，佢决定玩铺大嘅，结果就开咗一个国家——南越国。
秦亡之际，赵佗攻并桂林、象郡，建立南越国，自称“南越武王”，我哋嘅广州从一个城市，一跃为南越国国都，民间得名“越王城”“南越城”，但系正规史料上并冇呢两个名。
南越国存在93年，历经五代君主，一直到公元前111年汉武帝灭南越，之后广州就一直蛰伏，直到步骘出现。
百年南越国，系岭南文明最重要嘅奠基期，亦都系广州作为一国之都嘅辉煌时期。
▲如今解放北路嘅西汉南越王博物馆，就系依托南越国第二任君主赵眛（赵佗之孙）嘅陵墓所建
三国吴黄武五年，孙权下令将原来嘅交州分拆为交、广二州，广州州治设于番禺县，“广州”之名由此而起。
以上就系广州几大重要嘅古名，除咗呢啲之外，广州仲有啲古名，使用时间唔长或者存在疑点，就唔详细介绍，只作科普。
根据《广东通志·舆地志》记载，“广州城始筑自越人公师隅，号曰南武”，即广州最早嘅筑城者系越人公师隅，所筑城池叫南武城。
公元601年，为避隋炀帝杨广名讳，广州短暂改名为“番州”，后来又恢复原称。
五代十国时期，刘岩建立南汉国，设置兴王府（即系广州）为国都，呢次系广州第二次作为一国之都。
科普：广州历史上三次作为国都，分别系南越（前203年-前111年）、南汉（917年-971年）、南明（只存在咗几十日），史称“三南”。
